Расея працягвае грубую палітычную агрэсію супраць нашай краіны. Яна зламала, падпісаныя ёй, Вялікабрытаніяй, Беларусяй і ЗША, прынцыпы Будапэшцкага Мэмарандуму 1994 году аб гарантыях суверэнітэту Беларусі пасьля дабраахвотнага адмаўленьня нашай краіны ад ядзернай зброі.

Але памятайма, што рэальна абараніць свабоду і незалежнасьць Беларусі і рэальна змагацца супраць агрэсіі могуць толькі самыя беларусы. Ад нас найперш залежыць воля і свабода Бацькаўшчыны. І калі ўзьнікла пагроза яе існаваньню, то трэба скарыстаць усе магчымасьці ў змаганьні з імпэрыяй зла і перамагчы небясьпеку.

Адчуйма нашу сілу і салідарнасьць! Заўважце, што прамаскоўскі рэжым баіцца сьведамасьці народа, сілы і салідарнасьці беларускай моладзі. Таму ён перашкаджае ёй вучыцца і працаваць, таму ён без прычыны кідае маладых беларусаў за краты, як гэта зрабіў з Зьмітром Дашкевічам, адпраўляе маладых на “хімію”, палохае і зьневажае. Але тыя, што зьдзекваліся над Дашкевічам не пазьбегнуць адказнасьці.

Ня трэба баяцца тых, што баяцца нас. Мацуйма і яднайма нашыя сілы! Шануйма нашу вялікую і прыгожую беларускую мову і наш вялікі беларускі народ! Памятайма нашу магутную гісторыю і моц нашага Вялікага Княства! Хай веліч продкаў, якія ніколі не стаялі на каленях (як маскаль перад Альгердам, ці масква перад манголамі) – хай веліч продкаў натхняе нашу моладзь.

Мы ўсе, беларусы, мусім абараніць нашу Беларусь і нашу волю. І мы абаронім яе.

Жыве Беларусь!

Слава героям!

Зянон Пазьняк

18-20 студзеня 2007 г.