Аддзелы ў Нью-Ёрку і Нью-Джэрсі Беларуска-Амэрыканскага Задзіночаньня і Беларускі Моладзевы Рух Амэрыкі запрашаюць далучыцца да ўшанаваньняў памяці герояў-случчакоў.

Сьцяг Першага Слуцкага палка. Вільня, 1921. Лявон Вітан-Дубейкаўскі, невядомая, штабс-капітан Антон Борык

Сёлета, 27 і 28 лістапада  мы ўшануем памяць адважных герояў-паўстанцаў Случчыны, што ўзяліся за зброю, змагаліся і гінулі, баронячы Беларускі Народ ад паняволеньня і ад брутальнай навалы з усходу.

Запрашаем Вас ды Вашых сяброў і знаёмых узяць удзел у адзначэньні гэтай гістарычнай для Беларусі падзеі, аддаючы даніну памяці нашым слаўным і сьмелым продкам.

У суботу 27 лістапада а 12:00 (апоўдні) пройдзе ўрачыстае ўскладаньне вянкоў да помніка Беларускім Героям-Вайскоўцам на беларускіх могілках Сьвятой Жыровіцкай Іконы Маці Божай у Іст Брансвіку, што ў Нью-Джэрсі.

У нядзелю 28 лістапада а 10:00 раніцы распачнецца Сьвятое Набажэнства і Паніхіда ў памяць па Героях Слуцкага Збройнага Чыну ў царкве Сьвятой Жыровіцкай Іконы Маці Божай БАПЦ па адрэсе 9 Рывэр Роўд, Гайланд Парк, Нью Джэрзі (9 River Road, Highland Park, NJ, 08904).

А 12:00 (апоўдні) — пачатак праграмы па адзначэньні 90-й гадавіны з праглядам фільму пра Слуцкі Збройны Чын. Заплянаваны буфэт і абед.

Арганізатары сьвяточных імпрэзаў - аддзелы ў Нью-Ёрку і Нью-Джэрсі Беларуска-Амэрыканскага Задзіночаньня пры ўдзеле Беларускага Моладзевага Руху Амэрыкі.

Будзем рады бачыць Вас і Вашых сяброў, родных і блізкіх на нашых мерапрыемствах!