Сяргей Будкін, Радыё Рацыя

Цяпер у сусветным рэгістры ЮНЕСКА знаходзіцца 197 дакументаў, якія маюць сусветнае значэнне. Цяпер туды разам з архівам Лігі нацый, брытанскай Хартыяй вольнасці ды іншымі гістарычнымі дакументамі ўвайшоў і архіў князей Радзівілаў – старажытныя кнігі, найстарэйшыя з якіх датаваны яшчэ 14-м ст.

"У Беларусі знаходзіцца толькі частка з усяго архіву Радзівілаў. Бібліятэка князёў расцярушана па ўсім свеце, таму наша краіна была толькі ініцыятарам па ўключэнню яе ў рэгістр ЮНЕСКА, але праект ажыццяўляўся пры падтрымцы яшчэ пяці краінаў", - кажа старшыня камісіі па справах ЮНЕСКА у Беларусі Уладзімір Шчасны.

Беларускія навукоўцы правялі вялізарную працу і па электронным ўпарадкаванні Нясвіжскага кнігазбарору. Вынік гэтага – DVD пад назвай “Дакументальная спадчына Радзівілаў”.

Праект, звязаны з бібліятэкай Радзівілаў, будзе працягнуты. Уладзімір Шчасны акрэсліў галоўную мэту на бліжэйшы час: аднавіць хаця б у электронным выглядзе бібліятэку цалкам і стварыць у самім Нясвіжы цэнтр дакументальнай спадчыны Радзівілаў, каб кожны ахвочы атрымаў магчымасць пазнаёміцца з гісторыяй не толькі гэтага роду, але і ўсёй краіны.