Шэсьцьдзесят гадоў таму беларускія імігранты, што прыехалі ў Канаду па заканчэньні Другой сусьветнай вайны, вырашылі закласьці Згуртаваньне беларусаў Канады (ЗБК). Ягоныя заснавальнікі былі шчыра перакананыя, што беларусы ў Канадзе павінны мець сваю ўласную арганізацыю, празь якую яны маглі б дапамагаць адзін аднаму, захоўваць свае нацыянальныя і рэлігійныя традыцыі ды перадаваць іх дзецям і ўнукам. ЗБК імкліва расло і мацнела, за пару год яго аддзелы ўзьніклі ў васьмі канадыйскіх гарадах. Супольна зь іншымі беларускімі эмігранцкімі арганізацыямі ЗБК падтрымлівала і прапагандавала беларускую культуру ў вольным сьвеце. На працягу шасьці дзесяцігодзьдзяў ЗБК нязьменна прымала ўдзел у канадыйскіх міжнацыянальных фэстывалях ды канфэрэнцыях, уплятаючы беларускія краскі ў вянок канадыйскага шматкультур’я.

Амаль нікога з заснавальнікаў арганізацыі ўжо, на жаль, няма сярод нас. Але зерне, пасеянае імі, дало свой плён: ЗБК сёньня – адна з найстарэйшых і найбольш паважаных беларускіх арганізацыяў у Паўночнай Амэрыцы.

Мы вельмі спадзяемся пабачыць Вас на сьвяце. Пасьля кароткай афіцыйнай часткі Вас чакае стол-фуршэт і невялікі канцэрт.

Калі ў вас ўзьніклі пытаньні, дашліце электронны ліст на адрас This e-mail address is being protected from spam bots, you need JavaScript enabled to view it альбо пакіньце паведамленьне на аўтаадказчыку Беларускага грамадзка-рэлігійнага цэнтру: 416-530-1025.



Галоўная ўправа Згуртаваньня беларусаў Канады
Зьміцер Эльяшэвіч, старшыня ЗБК